Gooden Dag ook, leeve Dörpslüüd!

Nu hebbt wi dat Joor all bald wedder rümm, und ick dach soo bi mi, ward doch wedder Tied, sick mol to Wuurt to melln. Öbrigens, de Karkenglock boben is de Glock ut de Bliersdörper Kark!

Vör een Joor hev ick joo noch dacht, mit den Corona-Schiet sünd wi dör, obers disse Virus is nich doot to kriegen. Un nu hebbt wi toon tweeten mol Wiehnachten ünner Corona-Oploogen. Obers argern nützt nix, wi mööt tohoop holn und gesund blieven!

Mit de Dörpsentwicklung is dat toon Glück wieter gohn. De Arbeitsgruppen hebbt sick bannig angagiert: Sitzungen wöörn över dee Computers avholn as „online-meeting“. Dor kannst dien Noober op´n Bildschirm seen und sogor mit em snacken. Toon Deel hett de Bildschirm bannig flimmert. Jo, de Internet-Verbinnung bi uns in´n Dörp mutt beeter waarn, door schulln de Rootslüüd sick man mool üm kümmern.

Twee Dörpentwicklungsprojekte sün´ dit Joor ümsett woorn: De Bliersdörper Heuweg und de eerste Stufe von de Sanierung von´t DGH. Und de AGs hebbt ook all neeje Projekte op´n Zettel: de Fortsettung vör denn Wanderwech över Possmuur röver no´n Schroogenbarg und an´ne Töfenkamp-Siedlung und een Verbindung von´n Lohfeld röver an´n Daudiecker Weg. Dit Joor wull de Verwaltung noch nich so recht anbieten, in 2022 schall dat dann mit´n Förderandrach wool wat waarn.

In de Döörpspolitik is ook dit Joor wedder veel över tokünftige Baugebiete beroden woorn. Beschlooten woorn is, dat de nächsten Bauplätze in Bliersdörp an de Nottensdörper Stroot koomt - obers dat duurt noch een beten.

In´n September is de Gemeenroot neu wählt worn. So veele Plokote wi dit Joor hevv ick noch niemols vörher in Bliersdörp seen. Und as de Kommunalwohl toend wör, dor hevvt einige Pateien jümmer Plokote gor nich afnohm´ – de wörn wohl bangen, dat anners een jümmern Platz vör de Bundestagswohl innehmen wull.

Op de irste Sitzung von´n nee´en Gemeenroot is denn ook de nee´e Bürgermeister wählt worn. Dor hett sick nix ännert, de oole hett bi de Wohln de meisten Stimmen kreegen und so hebbt de Rootslüüd em ook all tohop wedderwählt. Wundert hett mi obers, watt bi de Wohl von´n irsten Stellvertreter afgohn is. Dor hebbt de Swatten sick mit de Wählergemeinschaft tohoop doon und een Stellvertreter ut disse Reegen wählt, obwohl de Mann von de SPD 6 mol so veel Stimmen von de Bürger kregen hett.

Jetzt bün ick jo mol gespannt, wie dat denn in´n Gemeenroot tokünftig wohl loopen deit, ob de Swatten nun jümmers mookt, watt jemm sülbst am besten passt, oder ob se ook mool op de annern Rootslüüd und de Bürger höört. Ick jedenfalls hevv noch de Hoffnung, dat de Rootslüüd an Bliersdörp denkt und de Arbeit vernüftig tohoop angoht – dat hebbt se de letzten Johr´n jo ook hinnkregen.

Ick wünsch joo all tohoop een besinnliche Wiehnachten, kommt man good in´t Nee´e Joor un blievt gesund!